Rosalía de Castro

O pasado 23 de febreiro celebramos o Día de Rosalía de Castro recitando o seu poema 

"CANTARTE HEI, GALICIA".

Se queres ver o ben que fixemos, fai click na imaxe.

As mulleres da nosa vida

Hoxe conmemoramos o Día Internacional da Muller 💜

O alumnado seleccionou unha muller importante da súa vida e fixeron un retrato do seu rostro no símbolo da muller, escribindo tamén o seu nome. Despois, utilizamos todos os símbolos para imitar as pólas dunha árbore, empregando a cor morada e en colaboración cos compañeiros e compañeiras de 2º de Educación Primaria. A que quedou preciosa?

Animais imaxinarios

Hoxe, aproveitando que estamos a traballar os animais en Ciencias da Natureza, fixemos unha actividade moi divertida: creamos animais imaxinarios. Foi unha actividade completamente libre, na que tiñamos que botar man da nosa imaxinación, pero cun elemento común: todos eles tiñan que ter as características apropiadas para sobrevivir nun deserto. Despois, explicamos como era o noso animal aos demais compañeiros e compañeiras.

BUUUM!

Que divertido é aprender xogando!

Encántanos facer cousas novas, así que decidimos cambiar o ditado de palabras tradicional por un DITADO EXPLOSIVO. Deste xeito, os nenos e nenas participan activamente ao ter que explotar diferentes globos para obter un papeliño cunha palabra que, posteriormente, teñen que escribir nas súas libretas. 

Nesta ocasión, practicamos as letras C/QU e G/GU. 

Primavera das Letras

Hoxe acudimos á Casa da Cultura de Sada para asistir ao acto de presentación do proxecto Primavera das Letras. 

Os compañeiros e compañeiras de 6º de primaria interpretaron unha obra de teatro sobre a vida de Luísa Villalta, a persoa homenaxeada, contando coa participación de nenos e nenas de diferentes cursos do cole, que cantaron e tocaron diferentes instrumentos.

VISITA AO MUSEO DE BELAS ARTES

Hoxe visitamos o Museo de Belas Artes.

Unha das traballadoras do museo explicounos que durante o Entroido desapareceran algúns obxectos dos cadros. De súpeto, apareceu unha mochila no chan do museo.

Sabedes que había dentro dela? OS OBXECTOS DESAPARECIDOS!

Nese momento comezou a nosa misión no museo: ATOPAR A QUE CADRO CORRESPONDÍA CADA OBXECTO. Credes que o logramos?

QUE VIVA O ENTROIDO!

Encántanos o Entroido!

Luns, martes, mércores e xoves cumprimos os mandatos do Meco: trouxemos un sombreiro, un pano, unhas gafas molonas e a roupa de durmir. 

O venres puxemos os nosos disfraces favoritos e celebramos o Entroido cunha gran festa! 

Coloreamos máscaras, bailamos, rimos e fixemos unha gran merenda con alimentos típicos de Entroido. Estaba todo delicioso!

Se queredes ver o ben que o pasamos durante toda a semana, facede click na imaxe.